Le 17 usque le
Le mathematica es interessante, etc., ma como sona le musica?
Assi (ogg)! Isto es le file Midi, e isto le partition como PDF. Io lo trova alique spooky, como si illo serea le musica de un film de horror (Dracula? Frankenstein?) ab le annos 1920 o 1930. Un atmosphera fusc e mysteriose. O forsan illo esseva ancora in le era del cinema mute? Comocunque, io trovava le effecto multo interessante, e pensava enthusiasticamente que illo deberea esser le consequentia de mi systema de intonation tan ingeniose e special.
Sed jam tosto le dubita me invadeva. Nam io audiva plus variation que io habeva componite. In le accordo c-e-g-a, quando le ‘a’ deveni ‘aih’, non solo isto sembla cambiar. Io isolava le effecto, con solo le notas g-a, pois g-aih, e audiva le mesme estranietate: le nota g anque cambia.
Mi proxime theoria multo brillante era de haber discoperite un illusion optic, no, non optic, ma con le aures, e con le cerebro como illo interprete le stimulos del auros. Dunque un illusion auditori.
Nam nos es totes tan fortemente familiarisate con le 12 notas equidistante de quasi tote le musica occidental, que al audir un secunda (circa 200 cents) que subito deveni plus grande, ma sin vermente attinger a un tertia minor (in mi scala le ‘a’ es 905,865 cents super le ‘c’, le ‘aih’ 968,826 cents, non 1000), nos debe mentalmente corriger le situation per audir le nota le plus basse plus basse, assi que le intervallo sembla de novo esser tan grande como nos expecta de un tertia minor.
Io non era convincite. Le file Midi, quando sonate in Windows 10 in vice de
Linux Mint, monstrava le mesme effecto. Isto pro me non bastava, e io
voleva verificar o falsificar le theoria in un maniera que era independente
del interpretation del musica e generation del Midi per Lilypond, e anque
independente del interpretation del codices Midi per le programma que sona
le file, in mi caso: VLC (o in su variante pro le linea de commando:
cvlc).
Con Windows 10 le violino sonava multo mal. In Linux: non installa vlc-bin
como Linux Mint 21.3 suggere, ma vermente vlc. Tunc vlc
ancora non voleva sonar Midi del toto.
Installar un plug-in me adjutava:
sudo apt-get install vlc-plugin-fluidsynth
Ma isto produce instrumentos de Midi que sona mal, como in Windows.
Additionalmente installar isto:
sudo apt-get install fluid-soundfont-gm
(gstreamer1.0-plugins-bad anque sembla esser necesse,
o ja es presente) produce le bon instrument samples como in
mi files de sono del typo ogg. Specialmente le violino,
viola, cello e flauta sona multo ben.
Como scribite, io cercava un confirmation independente del illusion
auditori conjicite. Pro isso io scribeva
un programma in C, que
genera un file de sono in le formato au, que contine
un nota g (198 Hz, nam 220 * 9 / 10), e alternantemente un
‘a’ (a un intervallo 27:24) e ‘aih’ (a 28:24). Aviso: isto
sona satis disagradabile, acute e pungente, proque le undulation
es simplicemente lo del dente de serra.
Que vos gaude.
Lo essential es: le illusion conjicite non es presente in iste
sample. Solo le nota alte muta, le nota basse remane equal.
Ergo le causa pote solo se trovar in Midi, o in le maniera in que
Lilypond o VLC tracta Midi.
Io studiava le codices in le file Midi que Lilypond habeva facite, e trovava le causa: le instruction note bend es valide per canal de Midi. Il existe in Midi 16 canales. In mi exemplo ‘spooky’, io lassava un violino hypothetic sonar tote le quatro notas de mi tetrades (a non confunder con tetrachordos) al mesme tempore. Isto es physicamente impossibile, ma in Lilypond e Midi, on pote torquer le realitate como on vole. Per consequentia, Lilypond invia tote le notas al mesme canal, e un instruction bend vale pro tote le notas del accordo.
Pro sonar le notas ‘g’ e ‘a’ le file Midi contine iste commandos:
00 e0 50 40 00 90 43 61 00 e0 70 41 00 90 45 61 83 00 90 43 00 00 e0 00 40 00 90 45 00 00 e0 00 40
(Io ha rearrangiate le codices hexadecimal pro clarificar le structura. In realitate le codices es consecutive.)
Isto vole dicer: al momento 00, adjusta (codice e) le altor del notas in canal 0 con 50 40, o +1,953 cents. Face un note on (9) con nota hexadecimal 43, decimal 67, isto es un ‘g’, con un velocity o intensitate de toccar le clave de un piano, de 61. Pois le nota ‘a’ (hex 45) es activate con un bend de 5,859 cents (codice: 70 41). Le deviationes es parve, e le notas e intervallo sona ben, ben que il non es clar qual del bends vale, proque solo un pote esser active pro le canal 0.
83 00 indica: alcun tempore plus tarde, e hic le duo notas es deactivate (velocity = 00) e le deviation del altor es reinitialisate al normal (00 40, no bend). Pois le notas ‘g’ e ‘aih’:
00 e0 50 40 00 90 43 61 00 e0 04 36 00 90 46 61
Le nota ‘g’ es equal que antea, ma le ‘aih’ Lilypond invia in Midi como hex 46 (dec 70; ais/bes), con un deviation 04 36, o −31,152 cents. Apparentemente, proque le deviation de frequentia es per canal, le nota g es anque abassate! Le resultato, relative al nota c, es 700 − 31,152 = 668,848, e 1000 − 31,152 = 968,848. Le ultime es un bon approximation del intendite 968,826, ma le altere nota non es correcte. Isto explica le effecto spooky (macabre, horripilante, spectral, phantomatic).
Pois pro le accordo de quatro notas (tetrade) le codification Midi es: nota c, 13,672 cents in basso, nota e (ergo 386,328 super le c), +1,953 cents, nota g, +5,859 cents, nota a. Alora pro le accordo alterate: le mesme, ma al fin −31,152 cents, nota bes. Probabilemente le ultime bend es effective pro tote le notas.
Io ha reimplementate le musica in spooky exactemente equal in le directory spookycorr, ma ora como un quartetto ad arco: cata del quatro notas de cata accordo es sonate sur un proprie instrumento, cello, viola, secunde violino, prime violino. Ogg, Midi, PDF. Ora le spookiness es via, tote le notas es independente e ha lor proprie intonation juste.
Le spookiness non es un characteristica de mi scala o methodo de intonation, ma era le consequentia de un limitation technic in Midi. Isto es ora certe.