Le
Le mathematica forsan es interessante e fascinante pro alcunes, al minus pro me, ma plus importante es: como illo sono? Da un tal scala e accordatura vermente facilitates artistic e possibilitates sonic que altere systemas non offere?
Naturalmente io ha essayate lo. Con Lilypond, clarmente. Le definitiones in Lilypond pro musica turc, arabe e perse divide le octavo in 72, 24 o 60 partes equal, accurate a 16,67, 50 e 20 cents. Esque specificationes plus accurate del altores de tonos es anque possibile, assi que on poterea specificar accordaturas, intonationes, temperamentos juste? Le responsa que io ha trovate es: si. On pote usar in Lilypond fractiones arbitrari, que specifica un division del tono integre (equal a duo semitonos), ergo de un intervallo de exactemente 200 cents.
Assi io ha facite un definition de mi gamma que usa pro cata nota 6 digitos del numero de cents, con tres decimales, ergo de facto son millicents. Le denomination del fraction es 200000, que es le grandor de duo semitonos exprimite in millicents.
Un exemplo: un tertia minor con un fraction o ration de 6:5 ha le distantia 315,641 cents, satis plus que le 300,000 cents del accordatura equidistante. Pro Lilypond io specifica iste deviation como 315641 minus 300000 millicents, ergo le fraction es 15641/200000. Quando Lilypond genera le file Midi pro isto, Lilypond include un instruction note bend pro facer le nota un poco plus alte. Originalmente le quantification de iste instruction non esseva standardisate, ma in General Midi le deviationes maximal es plus e minus 200 cents.
Le instruction comencia con e0 hexadecimal (si le canal de Midi es 0), sequite per 00 45, a interpretar con 45 essente le parte del numero le plus significante, ergo le valor es 4500 hex. Le codice varie inter 00 40 pro nulle deviation (no bend) via 00 30 (50 cents plus basse) e 00 20 (100 cents plus basse) a 00 00 (200 cents plus basse), e in le altere direction via 00 60 (100 cento plus alte) a 00 80 (200 cents in alto). Le codification 00 45 significa: 15,625 cents in basso, que es un bon approximation del plus accurate 15,641 cents.
Pro plus confortabilemente poter controlar files de Midi, io ha facite iste programma, que converte le duo numeros hexadecimal al deviation in cents.
Hwedwortehun es un Googlewhack. Le parola non existe e nemo lo uso. In plus, nemo ha unquam usate lo, mesmo non in le passato remote quando le internet e motores de cerca ancora non existeva.
Le gamma musical que io ha inventate, e que io explica in iste serie de articulos, contine in cata octavo 14 notas distincte. Dece-quatro o quattuordece in protogermanico esseva fedurtehun, /ˈɸe.ður.te.xun/, de fedwōr (4) e tehun (10). In le combination, le w e le longor del ō esseva simplificate con u como resultato, ma in gothico on ancora, o plus verisimilo, de novo, per hypercorrection, lo habeva: 𐍆𐌹𐌳𐍅𐍉𐍂𐍄𐌰𐌹𐌷𐌿𐌽, fidwōrtaihun.
Fedwōr, le parola pro quatro, reconstructe pro le protogermanico, esseva irregular. Viste le parolas pro quatro in linguas de altere brancas del indoeuropeo, interlingua includite, le parola deberea haber essite hwedwōr. On pensa que le deviation del disveloppamento forsan esseva causate per le similantia del parola pro 5, fimf, ma illo es anque irregular. Io non ben comprende isto, que nos lo lassa al specialistas.
Comocunque, io ha reestablite le wō del gothico in fidwōrtehun, quattuordece, e combinate lo con le forma theoretic pro quatro in protogermanico, hwedwōr, pro arrivar a un parola que non existe, nunquam ha existite e nunquam existera, hwedwōrtehun, scribite in un maniera simplificate como hwedwortehun, e usate lo, o abusate si vos vole, como le nomine de mi scala musical e le titulo del articulos super illo, e themas forsan plus o minus connectite.