Le 18–
Probabilemente in 1993, io faceva un experimento al guitarra, inspirate per le prime étude e altere pecias pro guitarra scribite per Heitor Villa-Lobos, in le qual on usa sempre le mesme configuration del digitos del mano sinistre (anglese: chord shape, nederlandese: greep), con alcun chordas digitate e alteres vacue (anglese: open string), in varie positiones del manico del guitarra.
Isto pote a vices crear effectos de sono surprendente e fascinante.
Mi resultato era un pecia multo curte, de solo octo mesuras, quatro pares de duo mesuras identic. Que facer con isto pro lassar lo devenir un ver composition musical? Solo repeter e iterar e repeter? Initialmente io habeva nulle altere idea.
De isto io publica ora un partitura, que include tabulatura e diagrammas del accordos, e un file sonabile del typo Midi.
Como Seja como for iste pecia tamben ha un atmosphera de acceptation calme, de resignation stoic, de acceptation del realitate como illo ya es.
Olim io appellava mi pecia, in portugese, “Tudo vem” (ia: toto veni), proque io pensava que le titulo que io habeva in mente originalmente, “Tudo bem” (ia: toto ben) esserea incorrecte, bem essente un adverbio, non un adjectivo, que es bom. Intertanto nonobstante, io es convincite que “Tudo bem” de facto es le expression existente e correcte.
Forsan isto pote esser explicate per le assumption que illo es curte pro “Tudo está bem”, non pro “Tudo é bom”. Le verbo portugese ser, con le forma conjugate é, es un verbo copulative, un copula, sed estar, cuje cognatos in altere linguas, como stand in anglese, staan in nederlandese, e ‘star’ in interlingua, significa ‘esser in loco’ o ‘esser in un position’, sovente un position erecte.
Al minus isto es mi theoria pro explicar lo. Io non es 100% secur que illo es ver.
Mi decision es que de nove e pro sempre, le titulo sera “Tudo bem”. Basta.
Quatro mesuras duple es multo poco, tro poco pro haber un ver composition musical complete. Io sapeva que in un certe momento io habeva addite un solo de guitarra, pro completar le pecia, ma naturalmente con le risco de crear un suppa de notas tro febril e chaotic, como es le caso con La nepovado kompreni. Le solo de Tudo bem totevia, io trova succedite.
Le 5 de martio 2025 io retrovava un partitura, facite probabilemente in
1994 con le vetule programma pro MSDOS, Dr T’s Copyist Apprentice,
del thema basic con un longe solo le guitarra. Duo dies plus tarde
io anque discoperiva un file de tabulatura, in le formato como monstrate
in
iste articulo, pro le programma de autoria mie, appellate
guittabl.
Io non plus sape que passos io ha facite, plus que 30 annos retro, pro attinger ille resultatos. Plausibile sembla: improvisar le solo al guitarra e registrar lo sur un banda de cassetta, usante mi Tascam Portastudio con 4 canales. Io ancora habe le bandas e le magnetophono, que totevia infelicemente non vole functionar. Forsan un die itero sic.
Comocunque, forsan con software que converte WAV a Midi, io ha extracte
le notas del solo? Isto es difficile, certo esseva difficile in 1994.
Io debe haber facite correctiones manual. Del tabulatura pro
guittabl io ha facite le partitura, io pensa.
Le solo clarmente es improvisate, non componite, proque illo contine multe syncopation, multe curte reposos al initio de un mesura, notas de longor curiose como cinque quartes de un sedecesime, sequentias de plure notas de tres sedecesimes, triolos, notas que se extende preter un barra de mesura.
Como crear del material disponibile un partitura in Lilypond, con effortio minimal?
Io pensava de converter le tabulatura pro guittabl a un file Midi.
Le programma ha un option pro illo. Ma io non pote compilar e executar lo
sub Linux, proque illo contine multe elementos specific a MSDOS, obsolete
e non portabile. Ergo io voleva reducer mi programma, eliminar de illo toto,
salvo lo que es necesse pro leger le partitura e scriber le Midi. Ma illo
probava esser satis difficile, proque le programma es troppo monolithic,
non bastante modularisate, crescite organicamente per adder plus e plus
functiones. Ora illo functiona ben, ma es difficile a mantener o reducer,
mesmo difficile a comprender pro me, ben que io mesme es le autor,
originalmente in 1993 e 1994, e anque del extensiones in 2020.
Solution: itero io installava e usava DosBox, un emulator de MSDOS, pro Linux e altere systemas operative – facilemente portabile, per le uso del bibliotheca SDL – le Simple DirectMedia Layer library. Assi io poteva lancear le vetule file EXE (pote anque haber compilate le files fonte in C, si necesse), e facer le conversion requirite.
Converter le Midi, usante lily2midi, totevia resultava in
un file pro Lilypond que esseva non rationalmente utilisabile.
Simplemente ya troppo chaotic. Isto es comprensibile, viste le
characteristicas describite
quatro paragraphos in alto.
E assi finalmente, io ha recreate le vetule partitura, olim facite e
imprimite con Dr T’s Copyist Apprentice, ora pro Lilypond,
per mano. Alcun dies de travalio, ma non un problema. Le resultato
es belle, le Midi sona ben, ma in MSDOS con guittabl,
le musica sona ancora melio, in mi non tan humile opinion.
In iste directorio il ha un
makefile e le
files fonte pro Lilypond, nam
TudoBem-base.ly,
TudoBem-guitbase.ly,
TudoBem-solo.ly,
TudoBem-guitsolo.ly,
con le qual make pote producer files PDF e Midi,
solo del base thematic del pecia (4 vices duo mesuras identic,
e un coda), e del base con un solo de guitarra:
TudoBem-base.pdf,
TudoBem-base.midi,
TudoBem-solo.pdf,
TudoBem-solo.midi.
Il ha anque
un registration
via audacity del pecia como sonate per le programma
guittabl, via
DosBox.
Derectos de autor © 2025 de R. Harmsen.