Maestria

Le 20 e , con correcturas le 22. Tradução em português.

Isto me place multissimo. Le titulo es Garota, le musicantes es le gruppo Choro das três. Tres sorores.

Primo le flauta transverse de Corina, le primogenita, joca le parte principal. Per su mechanismo de producer le sono, iste instrumento ha un belle variation e mixtura de ruito e fremito con frequentias melodic. Le melodia belle e calme es adornate con parve notas intermedie, facite possibile per un maestria de alte nivello, que obviemente Corina possede.

Le melodia es supportate per un lecto de belle accordos e harmonias del instrumentos accompaniante, nam le guitarra de septe chordas de Lia, e le cavaquinho de Pacheco (non un ukulele, ben que iste instrumento es derivate de un progenitor del cavaquinho).

Iste Pacheco es anque le autor del pecia Garota, como Elisa (le cadetta) conta al fin del video. Ille lo scribeva dedicate a illa como presente.

Al momento 2:06 del video le pecia sembla haber trovate su fin. Ma alora illo comencia de novo! Nam con un sono mute e basse al guitarra de Lia, que comocunque, io non sape explicar proque, me emotiona. Sono de iste typo retorna varie vices.

Gitarristas principiante a vices produce tal sonos per un manco in le technica de sonar, quando un digito del mano sinistre es incorrectemente placiate, non detra le fret, ma sur illo. Detra le fret le digito pulsa le chorda contra le fret, e assi accurta le parte del chorda que pote vibrar, ma sin obstruer le vibration. Iste require un placiamento accurate, proque un position troppo detra (in le direction del capite) causa que le accurtamento non es bon, con un sono strepente como resultato. Un position plus in le direction del ponte causa un impedimento del vibration.

Lia hic face le notas mute, io es secur, non ab un manco de technica, ma contrarimente ab su maestria del instrumento, intentionalmente, pro usar le guitarra temporarimente como un instrumento de percussion in vice de esser melodic. Isto require un accuratessa ancora plus grande que pro notas normal, proque le vibration del chorda debe esser assurdate un poco, ma non troppo. Il ha solo un margine multo parve pro le positiones in le qual isto sona ben.

In le secunde parte de ‘Garota’ clarmente le rolo de solista, previemente jocate per Corina Meyer Ferreira, es assumite per Elisa, tamben Meyer Ferreira, essente illas sorores. Le instrumento principal de Elisa es le mandolino, in su variante brasilian appellate bandolim. Sed illa es un multi-instrumentalista, qui sona anque le clarinetto (4:17), banjo, piano, e accordion. E tote tres sorores a vices tamben canta.

In iste videos on vide anque le patre Eduardo Ferreira, parte del banda como percussionista, sempre presente, sin esser conspicue, ma importante, anque in le passato, como discoperitor, stimulator e disveloppator del talento de su filias.

Io non sapeva, ma lege hodie que ille non plus vive. Ille moriva le 12 de junio 2021 per complicationes de Covid-19. Ille habeva solo 60 annos. Un tragedia. Requiescat in pace.

Es difficile ora continuar a scriber mi articulo como planate. Tamen io lo essaya.

Le maestria del instrumentos per le sorores Meyer Ferreira non mena a un fasto technic, non a un concurso de qui sona le plus notas per secunda, ma es empleate pro controlar subtilmente in cata momento le tempo e dynamica, sonante poc notas o multes como necesse, addente fiorituras quando functional, con un timing e coordination reciproc perfecte.

Isto require un maturitate plus sovente observate in musicos de medie etate, ma hic ja presente in iste sonatores relativemente juvene. Io supputa al base del Wikipedia como annos de nascentia: 1988, 1990, e 1993.

Iste maestria e controlo on vide e audi tamben in iste video, registrate in 2016 durante un tournée del Statos Unite. Quando me lembro, Quando io me memora. Scribite per Luperce Miranda (1904–1977). Fiorituras, si.

Importante es anque le aspecto social: le individuos, totes brillante, non sona pro mesme esser un stella, ma pro lassar un altere musico, e le musica mesme, esser le stella. Isto es musicar serviente.

Un del stilos basic del gruppo Choro das 3 es le forró, dansa e musica. Personalmente io senti que mi preferentia non va in ille direction, ben que isto sona multo ben. Forró Barroco.

Epilogo etymologic: