Le 17 e
Ja seculos il existe in linguas germanic un alternantia inter le sonos [r] e [z], que on pote vider in le sequente exemplos:
| lingua | infinitivo | participio / adjectivo |
|---|---|---|
| nederlandese | verliezen | verloren |
| germano | verlieren | verloren |
| anglese | lose [lu:z] | lost |
| anglese | forlorn | |
| nederlandese | vriezen | gevroren |
| nederlandese | bevriezen | bevroren |
| germano | frieren | gefroren |
| anglese | freeze | frozen |
| nederlandese | kiezen | gekozen |
| nederlandese | uitverkiezen | uitverkozen, uitverkoren |
A mi surprisa, iste parolas habeva un [s] in proto-germanic, non un [z]. Io pensava que anque ja in ille vetere tempores, il haberea un alternantia inter [r] e [z]. Forsan un altere. Ora io non va explorar le detalios, proque isto non es le thema de iste articulo.
Vide anque keur.
In le historia del galleciano/portugese il ha habite un alternantia inter [l] e [r], que nos pote vider in le portugese praça, espaniol plaza, italiano piazza, e interlingua placia. Il ha ancora alcun tal parolas.
Le vocabulo ‘lilio’ de interlingua es ‘lírio’ in portugese e ‘lirio’ in espaniol. Le accentuation es le mesme, nam al prime syllaba; le variation in scriber i o í es debite a regulas orthographic differente. Le origine es le latino līlium. Le r occurre solo in linguas del peninsula iberic, como galiciano, portugese, espaniol, catalano. Altere linguas ha duo vices l como le latino.
Ma ora il deveni interessante: le vocabulo latin līlium proveniva del greco λείριον, pronunciate [ˈleːrjon], plus tarde [ˈlirjon], anque de novo con un l e un r, como in espaniol e portugese. Ma solo per hasardo, io presume, sin relation causal.
Anque le vocabulo grec esseva un parola imprestate. Le r ja era presente in copto, le lingua de Egypto ante que le arabes expandeva lor lingua, religion e regnos. Variantes plus vetere del lingua copte, le demotico e egyptio, mesmo habeva duo vices r, non l! Le formas, como doctos ha trovate o reconstructe, esseva hlēri, hrēre, ḥrry, ḥrrt.
Lírios, Cristina Branco, 1988, do disco Murmúrios.
E isto es un gruppo musical del qual io sape nihil. Discoperite heri, le 17 de decembre. Lirio es le nomine. Le membros es Wouter Kuyper, Sander van der Schaaf, Gerdien Smit.