Vota pro nostre valores

Traduction publicate le 13 de maio 2017. Le original in nederlandese data del 10 de martio 2017.

Introduction

Al ultime momento ante le electiones parlamentari in Nederland del 15 de martio 2017, hic es mi consilio electoral non sollicitate. Io avisa votar desde principios. Vota pro nostre valores. Ergo non vota pro le PVV de Geert Wilders. (PVV = Partij Voor de Vrijheid, Partito Pro le Libertate, un partito del extreme dextera e anti-islam in Nederland.)

Libertate religiose

Secundo lor programma electoral, le PVV vole clauder tote le moscheas e scholas islamita, e vole prohibir le Koran.

Tal clausura e interdiction i contra nostre libertate constitutional de creder in un Deo (sed le buddhistas non lo crede), contra nostre libertate de religion (sed le humanismo non es un religion), contra nostre libertate de convictiones de vita. Il es ille libertate, on me inseniava in le schola primari christian, pro le qual nos nederlandeses luctava durante le Guerra de Octanta Annos. Esque nos deberea subito renunciar a ille principio, solo proque anque alcun muslimes vive in nostre pais? Io lo trova fundamentalmente mal e improprie.

A proposito, ille pretendite libertate religiose post nostre victoria in le Guerra de Octanta Annos, super le oppressor espaniol, non vermente era tanto obvie. Ancora multe tempore le catholicos debeva assister al culto in ecclesias clandestin. E quando esseva decapitate Van Oldenbarnevelt e imprisionate Hugo de Groot (qui plus tarde escappava, celate in un cassa a libros), un del factores era lor membrato al confession del remonstrantes, in contrasto con le autocrate, le Principe Mauritio de Orange, qui era un contraromonstrante.

Le lucta inter contraremonstrantes e remonstrantes habeva a vider con Gomarus e Arminius (quanto nederlandeses ancora cognosce ille nomines?). Le arminianos, como io lege in le articulo nederlandese sur Hugo de Groot, esseva de opinion que le stato es le autoritate supreme, ergo domina le autoritate religiose. Ecce, isto es in le anno 2017 precisemente alsi le principio mie: io es in favor del libertate religiose, etiam pro muslimes, ma io es anque pro le primatia del stato de derecto secular de mi pais Nederland.

Le autoritate del lege nederlandese, de judices, de ministros e burgomaestros, policia e justitia supera le autoritate de imames, predicantes, pastores e le papa. Isto non va placer alcun muslimes, e non alcun advocatos christian de un theocratia; sed assi il es, assi il debe ser e assi il debe restar. Isto nos debe defender, proque isto face parte de nostre valores secular.

Criminalitate

On dice que in prisiones certe ethnias es superrepresentate. Illo es un problema seriose. Nos debe non disviar le reguardo de illo, nos pote mentionar lo. Il se tracta per exemplo de marocchinos, altere musulmanes, surinameses e antillanos.

Io me demanda totevia, si in le cifras on ha tenite conto del composition demographic. Puberes masculin es per lor natura plus moleste que pueras e personas adulte. Juvene homines es plus sovente criminal. Ergo si per disveloppamentos demographic in le passato, in certe gruppos ethnic il ha un superrepresentation de juvene homines, solo illo ja resulta in plus molestia e criminalitate per membros de ille gruppos. Illo non significa que le gruppos in totalitate es malitiose.

Mesmo si illo non es le sol factor: suppone que de un gruppo de origine 1 per cento causa problemas, e de un altere 5 per cento. Cinque vices tanto, illo es serie e on poterea prender mesuras contra illo. Ma le quales? Mesmo assi, 99 e 95 per cento mena un vita virtuose. In ambe casos un majoritate imponente. Illo monstra quanto injuste il es, jectar a gruppos total le culpa pro illo que face un parve minoritate.

Humanos ha le tendentia de vider un imagine distorquite de tal cosas. Le differentia inter 1 e 5 illes vide plus tosto que le similantia inter 99 e 95. Nos debe vigilar contra iste distortion, nos debe tractar cifras probemente, sin generalisation, sin discrimination.

Punition equal

Qui face alco punibile, debe ser punite. Le judice determina le grado de punition, intra le maximo legal. In isto le judice tene conto de tote le circumstantias del causa. Un tal circumstantia NON es le ethnicitate del accusato.

Illo serea principalmente injuste, contrari a nostre valores e a articulo 1 del constitution de Nederland, que dicta tractamento equal pro totes. Il non es acceptabile como punition privar alcuno con duple nationalitate del nationalitate nederlandese. Nam pro le mesme crimine, alcuno qui es solo nederlandese non es assi punite. Como on dice in nederlandese: Gelijke monniken, gelijke kappen. Le mesme monacho, le mesme cappucio. In anglese: What is sauce for the goose is sauce for the gander. Lo que servi pro uno servi pro alteres.

Le programma electoral del PVV promitte: “Criminales con duple nationalitate nos va denaturalisar e expeller.”. Illo es incorrecte, illo contradice nostre valores e illo non pote evenir. Ja solo pro isto: non vota pro le PVV. Vota pro mantener nostre stato de derecto, vota pro conservar nostre valores.

Loyalitate

Qui nasceva in un altere pais, o cuje parentes o granparentes de illac proveni, ancora senti un certe vinculo con ille pais. Illo es logic. Tanto de turcos e marocchinos in Nederland, illo es ver de gente de origine nederlandese in Canada, le Statos Unite o Australia.

Gente pote haber opiniones e exprimer los. Anque opiniones sur politica, incluse le politica de altere paises que Nederland. Isto seque de nostre valor ‘libertate de parola’. Isto include opiniones que ‘nos’ non place. Mesmo iste valor cape personas qui supporta le politica actual de Turchia, un pais que trunca le libertate de pressa, carcera politicos electe, e amplia le poter del presidente.

Le pensata es libere, le expression de pensamentos es libere intra le limites del lege, ager es libere solo in parte. Assi il functiona in un stato de derecto. E assi il debe remaner, in isto nos debe persister.

Terrorismo

Terrorismo es detestabile e abhorribile, e debe ser combattite con omne medios. Sed intra le limites del lege.

Ja ora non solo committer un attentato es punibile, sed etiam preparar un. Isto es drastic: alcuno debe ser sententiate ben que ancora il non ha victimas. Ma io approba que le lege ha essite extirate assi. Proque le securitate lo require.

Servicios secrete pote interceptar cata vice plus communicationes. Illo viola le vita private de omne citatanos. Ma in le interesse del lucta contra le terrorismo, io lo judica necesse.

Multo poc muslimes es terroristas. Multe terroristas (ma certo non totes) es muslimes. Pote nos bannir terrorismo islamic per expeller omne muslimes? Forsan. Ma il es un approche estranie, si on parangona terrorismo e traffico stratal. Un comparation contorquite vidente que terroristas face victimas deliberatemente e accidentes eveni sin intention.

Tamen cata die il ha mortos in le circulation e decenas de feritos. Nos non tira de isto le consequentia de arrestar omne traffico. Nam traffico es necesse, in omne caso le transporto de mercantias. Le supermercatos debe esser approvisionate. Le porto de Rotterdam debe continuar a functionar.

Nos pesa le importantias e prefere le interesse logistic, ben que illo costa vitas. Item nos debe pesar valores quanto al terrorismo. Punir un gruppo collectivemente pro le delictos de alcunes de illes, illo es inconciliabile con nostre valores. Ergo illo nos non face. Basta.

Sexualitate

Sexo ha sempre essite un joco de repeller e attraher, de passion exuberante e de pudicitate. A transverso le seculos gente ha luctate pro trovar le bon medio inter ille extremos.

In le cultura occidental le accento esseva saepe sur le caste pudor. In le annos 50 del seculo vinti sexo esseva non mentionabile, on fingeva que non existerea. Al plus inter homine e femina intra le matrimonio alco esseva permissibile.

Durante le revolution sexual del annos 60 e 70 le pendulo se inclinava al altere latere: toto sia permittite. Mesmo sexo inter infantes e adultos on faceva thema de discussion, sin condemnation, e qui assereva haber essite violate, tosto esseva depingite como posatora.

Felicemente illo esseva plus tarde rectificate: pedophilia es ora universalmente disapprobate, violentia e intimidation sexual es viste como le problemas grave que illos es. Le tendentia amplemente corroborate in le moral occidental es ora: consenting adults. Si nulle minores de etate es implicate, si on non abusa un relation de dependentia, e si il non ha violentia o compulsion, il es bon, il es acceptabile.

Muslimes generalmente es plus conservative re ille cosas. Nos in le occidente pauc tempore retro etiam. Le acceptation de homosexualitate es multo recente. Ancora usque 1956 in Nederland le marito esseva le capite de familia e le sponsa officialmente incapabile de ager: illa mesme poteva nihil decider e non mitter su firma sur documentos.

Muslimes stricte vide le rolo del femina solo in le menage e pro parturir infantes. Io non lo trova bon, sed etiam io lo trova hypocrita si pro iste ration nederlandeses autochthone e politicos depinge muslimes como barbaros, quanquam nostre proprie modernitate in le lumine del historia es mermente un strato fin de vernisse de alcun decennios recente.

Comprehension pro homosexualitate, e pro sexo ante o foris del matrimonio non proveni del assi appellate radices judee-christian de nostre cultura, nam le Biblia, certo in le Ancian Testamento ma anque in lo que scribeva Paulo, es re iste thema tanto conservative e anachrone como le Koran e sharia.

Si il dependeva de mi, le avisos moderne e tolerante super sexualitate serea tosto adoptate per multes, etiam per muslimes e altere immigrantes o refugiatos. Sed illo nos non attinge per condemnar e execrar les. Plus tosto per dar le bon exemplo, per monstrar le alternativa e como agradabile illo es.

Io crede ben, que il ha ancora muslimas qui remane sempre in le casa pro facer le menage. Sed certo non omnas. Nam si in le strata e in magazines io mira circum me, io vide frequentemente damas con pannello de capite, alsi al volante, a bicycletta o como cassera. Illas es la sol o con altere feminas, a vices con infantes con qui illes parla satis sovente le nederlandese. Le maritos o fratres chaperonante, qui in theoria deberea preceder las qualque passos, io vide quasi nunquam.

Apparentemente le normas e valores anque inter muslimes es in un periodo de lumines. Si nos les lassa in pace a fin que illes pote tranquillemente transversar lor proprie evolution verso le modernitate, in vice de confrontar les con reproches e diffidentia, finalmente toto va ser ben. Tal cosas require tempore. Anque nos besoniava multe decennios, nonne?

Union Europee

In le programma electoral unipaginal del PVV sta: “Nederland de novo independente. Ergo sortir del UE”.

In mi opinion nos debe remaner intra. Cooperar es bon pro Nederland. Bon pro le pace e bon pro le negotio international, del qual le economia nederlandese profita. Ma io es anque pro autonomia national. Quanto a me, Europa non debe obtener plus poter. Il es bon como ora es, il suffice.

Le Union Europee ha un poter considerabile. On face directivas, que alteremente que le parola nederlandese suggere (richtlijn, un instruction sin ingagiamento), es leges compulsori, que le statos membro es obligate a incorporar in lor proprie legislation.

Le poter in le UE es concentrate in le Consilio Europee, consistente del chefes de governamento del paises membro. Isto rende le democratia del UE multo indirecte: le leaders de governamento in multe paises non es electe, mermente habe le supporto de lor parlamento national, que si es electe.

Multes dice que le UE debe devenir plus democratic. Per exemplo, le Parlamento Europee deberea haber un poter major. Le disavantage de illo totevia es, que in un systema de representation proportional, le grande paises haberea plus influentia que le parves. Nederland como un pais relativemente parve, non deberea voler illo.

Grande paises del UE inter alteres es Espania, Francia, Germania e alcun tempore ancora Anglaterra. Con omne quatro in le curso de nostre historia nos nederlandeses esseva in guerra. Finalmente nos reganiava nostre libertate. Per un Europa theoreticamente plus democratic, le domination venirea retro!

Le UE actual, in le qual Nederland ha un voto tanto ponderose como le paises plus grande, io trova le juste compromisso inter collaboration necessari e le retention del autonomia.

Historia del traduction: le 30 de martio, 5, 25 e 26 de april e le 7–13 de maio 2017, del qual le 12 e 13 de maio esseva pro correction e revision final.