Le 22–
Mi inspiration iste vice es le video Río Ancho, per le Dúo del Mar. (Le nomine espaniol, non surprendente, significa Duo del Mar.) Postate le 2 de augusto 2016, un video moderne, sed in nigro e blanco. Io apprendeva de su existentia le 11 de maio 2021 via un “story” in Facebook, postate per le sonator del guitarra portugese Marta Pereira da Costa.
Io nunquam comprehende proque gente utilisa iste “stories”. A vices le sono non functiona. Le imagines es stationari o movente. Sovente cata forma de explication manca, e io non comprende que le postator vole dicer con le story. E le major problema: si il ha ligamines, illos non es cliccabile! Isto es, _io_ non los pote cliccar, forsan proque io usa sempre un laptop. Le stories solo functiona ben sur un telephono mobile, in un app de Facebook? O non ben mesmo assi?
Comocunque io tamen trovava le ration que Marta Pereira da Costa debe haber habite pro postar le story: un projecto commun de Marta PdC, Dúo del Mar, e le dansatrice belge Nelle Hens.
Un del feminas in le video Río Ancho, ab lor perspectiva al dextra, ma al sinistra pro le spectatores, io recognosceva immediatemente como un del membros anterior del gruppo Las Migas. (Le nomine significa micas de pan, o le essentia, le nucleo, o forsan le intention es referer a un platto facite de micas.)
Io apprendeva del existentia del gruppo Las Migas gratias a un consilio de Inger Maria Olsson, le 29 de april 2015, que io tunc condivideva.
Alcun videos de Las Migas in Youtube: Concerts Privats nº8, Gitana Hechicera – Rumba de Barcelona, Els Concerts del Cabaret Elèctric.
Ancora io non ha mentionate le nomine del membro del Dúo del Mar que io recognosceva: Marta Robles. Isto es su sito web, e isto su canal de Youtube. A non confunder con le jornalista del mesme nomine. Hic es le canal Youtube del Dúo del Mar. Le altere membro del duo es Ekaterina Záytseva (Екатерина Зайцева, a non confunder, etc.), qui es originalmente de Russia, ma ha vivite in Espania ja durante plus que un decennio.
Ora retro al video del Dúo del Mar, que me ha inspirate a scriber iste articulo. Illo es multo cognite pro me, essente un del tracks del disco, registrate in vivo, intitulate Friday Night in San Francisco, (‘Vespera de Venerdi in SF’) per le guitarristas Al Di Meola, John McLaughlin e Paco de Lucía.
Le pecia es de facto un combination del Mediterranean Sundance (‘Dansa Solar Mediterranee’) de Al Di Meola, primo disvelate in su disco de 1977 Elegant Gypsy (‘Gitana Elegante’); e Río Ancho (‘Fluvio Large’) de Paco de Lucía, que habeva su début al disco Almoraima de 1976. In le concerto del tres, John McLaughlin non sonava in iste pecia, ille habeva su tornos alterquando.
Car memorias, del fin de 1980, comencio de 1981. Io viveva in cameras locate, in le casa de un vetule femina que io non trovava multo sympathic. Ma io viveva multo presso mi labor, in Zeist con le tunc justo fusionate Raiffeisenbank e Boerenleenbank, hinc le nomine nove Rabobank. Illo esseva ben practic. Nos habeva justo rumpite le relationes, mi amica e io, ben que iste amica es le femina qui ancora hodie es mi uxor. Un estranie mixtura de libertate e nostalgia.
Io soleva de septimana passar alcun vesperas in un café de musica in Utrecht, ’t Oude Pothuys, ubi il surgeva post alcun tempore sovente sessiones de musica spontaneemente improvisate, non de multo bon qualitate, ma agradabile. Io remaneva illac a vices usque duo o tres horas in le nocte, bibeva solmente succo de cassis proque io debeva retornar in auto, mi Citroën Dyane verde venenose.
Altere vesperas io remaneva in casa, e occasionalmente bibeva alcun vitros de vino de Porto. Forsan illo ha contribuite al atmosphera calorose e contente que de novo audir le musica del tres guitarristas Al Di Meola, John McLaughlin e Paco de Lucía sempre invoca in me. Le parola nederlandese ‘loom’ salta in mente, ma secundo dictionarios non ha iste significato.
Il habeva presso mi casa in Zeist un domo de campania, blanc ma derelicte, con tracias de un incendio, tunc ancora accessibile, e a vices io veniva al tecto, e formava phantasias romantic de devenir un musico multiinstrumentalista, lo que nunquam se ha materialisate. Hodie io pote sonar quasi solo le guitarra, e non multo ben per la manco de practica.
Le Dúo del Mar sona le pecia combinate de Al Di Meola e Paco de Lucía bastante precisemente como al disco original, cosa que non me vexa. Erga le fin illes improvisa un poco plus. Le sentimento placente que illes invoca con lor sonar es real. Io regratia le musicos pro illo.
Un altere favorito mie del disco original es Guardian Angel de John McLaughlin, sonate per totes tres.
Derecto de autor © 2023, R. Harmsen, tote derectos de copia reservate, all rights reserved.