Dece annos passate

Le 13, 16 e 17 de martio 2023

Since I’ve been loving you (Desde que io ha amate te) es un canto de Led Zeppelin ab 1970, que me placeva e place multo. Io lo cognosceva ja in le periodo de su publication. Io habeva lo sur un banda de cassetta, registrate del radio o de un disco prendite in presto del bibliotheca. Plus tarde io anque comprava le LP (nl: langspeelplaat, en: long play record), con le titulo Led Zeppelin III. Io ancora lo habe. Scribite sur le camisa interior es le data del compra: le 15 de septembre 1983. Loco: Arnhem.

Io ha nominate le pecia ja in un altere articulo musical, nam hic.

Cetero, es un estranie nomine, iste Led Zeppelin. Un zeppelin, nos sape, es un nave aeree. Ma Led? Le participio del verbo anglese to lead, diriger? In le passato io ha sovente pensate que iste parte del nomine poterea anque esser un joco de parolas con le elemento chimic plumbo, Pb. In anglese: lead, que sona non como le infinitivo e formas del presente del verbo, [liːd], ma como le formas passate verbal, le participio includite, [led]. Plumbo es pesante, e zeppelins obviemente ni es ni esseva de plumbo, plus tosto de aluminium, o de stoffa sur un ossatura de metallo.

Ora in 2023 durante que io scribe iste articulo, io vide que il existe un parola in interlingua, ‘dirigibile’, que como substantivo es un del traductiones possibile del nederlandese luchtschip, aeronave. Il anque ha le parola ‘aerostato’, un bestuurbare luchtballon in nederlandese, un ballon aerostatic dirigibile. Il sembla probabile que isto es le fundo del elemento Led in le nomine del gruppo Led Zeppelin.

In le annos 1970, io sapeva anque de altere cantos del mesme disco, Led Zeppelin III, e de Whole lotta love. Sed non del famose Stairway to heaven. Stairway to heaven io audiva pro le prime vice quando illo habeva acquirite un position permanente in un hitparade annual in Nederland, le Top 2000 aller tijden, un lista del 2000 favoritos de tote le tempores del ascoltatores de radio.

Multissime plus tarde, nam le 19 de februario 2011, io discoperiva tres altere pecias de Led Zeppelin, que io trova multo belle, e que como io lo senti, possede un atmosphera, un sentimento, un emotion similar, nam un de nostalgia, appetentia, e de calor contente.

Ten Years Gone, a non confunder con Ten Years After, nomine del gruppo del guitarrista e cantor Alvin Lee (1944–2013), devenite famose per su concerto durante le festival de Woodstock in 1969.

Le nomine e expression Ten years after pro me personalmente habeva obtenite un significato symbolic alique dolorose, nam lo de dece annos plus tarde ancora non haber attingite cosas que io judicava necesse attinger. E vinti annos plus tarde? E trenta?

Intertanto io sape que illo esseva de facto un error de appreciation: le necessitate supponite ja tunc non existeva. Plus specific io non pote o vole esser.

In conclusion, ancora alcun pecias remarcabile de Led Zeppelin: No Quarter, 1973, non audite per me ante le 24 de julio 2015. Custard Pie, 1975, ma non audite ante le 28 de maio 2007 (ora in 2023 io non comprende ben que es tan remarcabile super le canto?).

Le 21 de april 2022: “There’s a Led Zeppelin song so difficult that the band refused to play it live” (‘Il ha un canto de Led Zeppelin tanto difficile que le banda refusava sonar lo in vivo’): Four Sticks. Sona ben, io trova, contine typos de mesura estranie, como 5/4 al comencio e cata vice resurgente.