Le , mi proprie traduction de mi proprie articulo in nederlandese.
Gente pote parlar super football sin fin. Le trainator non functiona ben e debe esser dimittite, o contra es splendide. Le jocatores costose es stellas pretentiose, o merita ben le moneta pagate. Un pais es multo melior que le altere.
In realitate toto isto es completemente sin relevantia. Nam football es un joco de hasardo. Si, si nimie jocatores non sape jocar, o non presta attention, o trova se ipse plus importante que le equipa, tunc illes perde de un team que ha isto cosas in ordine.
Sed sur un nivello alte, mesmo professional, obviemente tal problemas non existe. Le jocatores maestra le joco de pedes, le goal-keeper anque sape facer cosas con su manos, illes ha trainate dunque es in bon condition, e illes coopera proque football ya es un sport de equipa.
Implication: ambe equipas ha un defensa egregie, que le attaccantes justo non succede rumper. Ecce perque football es tan insipide: sovente durante grande parte del match le score remane 0-0, 1-0 o 1-1. De facto nihil eveni. Il ha nihil de captivante a vider.
Tanto como le marathon de 42,195 km es humanmente troppo longe, un match de football es concipite expresso assi que on a pena pote perdurar. Duo vices tres quartos de hora, sprints includite, es troppo longe, certo si il ha tempore supplementari, duo quartos de hora.
Per illo multo longe tempore nihil del toto adveni, sed verso le fin, o in le tempore supplementari, le jocatores es fatigate o mesmo exhauste, e illes va facer errores. Qual errores, per qui, ubi, quando e quantes, isto es mer hasardo. Isto face football un joco de chance, tanto como roulette o blackjack.
Tote le commatrage es ineptia. Le victoria de Nederland contra Turchia le 6 de julio passate, monstra perfectemente que io ha ration.