Natation particular

Le 11–13 de februario 2020

Sexantas

Un sportivo io non es e nunquam esseva. Ma natar io ha apprendite. In le quadro del natation scholar, in lo que tunc on appellava le ‘Sportfondsenbad’, le bassino del fundos de sport. Pro me illo era un mer nomine, nihil plus. Del significato del nomine e del natura del Sportfondsen nominate io non pensava.

Iste piscina habeva su cabinas de cambiar in le cellario. Quando io pensa a retro io vide spisse tubos, con scopo incognoscite. Le tecto del natatorio era del typo glissante. Un memoria mie felice es del estate de 1966 o 1967, in le qual io natava sur le dorso, sub le tecto aperte e celo azur calide, ja con duo diplomas de natation.

Io ha legite que in 2019 on non sapeva que facer con le edificio ora totalmente perimite.

Novantas

Quando era le prime vice io non me memora, ma quisape vinti, trenta o plus annos retro io trovava me in le aqua, practicante un stilo de natation que io ha vidite nemo altere usar.

Il se tracta de natation vertical, non horizontal. No, non vertical con le pedes in basso e le capite in alto. Sed con le spatula e hanca dextere in le aqua, e le sinistres supra, in cyma del aqua. Non un stilo de pectore, non de dorso, no, natation in decubito lateral. Con le corpore como le quilla, le carina de un nave, o le ala de deriva de un veliero con fundo plan. Con minus resistentia que si le corpore serea horizontal? Io non sape, ma il certo senti assi.

Datos mechanic: le bracio dextere es tendite in avante, con le mano horizontal pro un restistantia minime. Le gambas es retirate. Tunc, in un motion forte de cisorios, le gambas se extende, e simultaneemente le mano sinistre va in avante, a basso, a retro, pro propulsar le corpore. Alcun momentos nihil muta, pro profitar del velocitate attingite. Alora le mano dextere anque va a basso e a retro, tornante un poco al sinistra. E repete le procedura.

Facer le mesme con le latere sinistre in basso, io non pote. Mi corpore, o in cata caso mi cerebro, comocunque non es symmetric.

Addition del 15 de februario

Vide anque le discussion in Facebook. La emergeva le termino “northern kick”. Con illo io trovava in Youtube un video que monstra un stilo de natation multo simile al mie, con le terminos “Scissor Kick” e “Side-Stroke”.

Ergo le stilo que io inventava spontanee- e independentemente, ja existeva. Non surprendente.

Colores: Enoiose Extravagante Necun preferentia Recarga le pagina