Ideas del 23 e 24 de novembre, le 1, 13 e 14 de decembre 2015, le 15 de januario 2016; texto del 30 e ; correction del texto le 1 de novembre 2016.
Humanos moderne vive in un mundo valde differente que illo de lor congeneres de myriannos retro, quando totes ancora viveva de chassar e colliger. Sed illes mesme non ha mutate multo. Ergo, pro comprehender como pensa, senti, e specialmente comporta se le humano moderne, io crede que nos debe considerar su lucta pro le existentia, su concurrentia vital in le situation de tunc.
Le densitate de population esseva multo basse. Le estimation pro circa 8000 annos retro es de solmente 5 milliones de gente, pro tote le mundo! On viveva in gruppos de unos centenas personas. Pro superviver, cooperation inter membros del proprie gruppo esseva essential. Nemo poteva superviver sin cooperar. Altruismo intragruppal esseva un necessitate. On travaliava pro le interesses del altere membros del gruppo, como pro le interesses proprie.
Le chance de incontrar personas de altere gruppos esseva basse, proque le population esseva sparse. Si totevia un incontro eveniva, le necessitate de supportar se mutualmente, como existeva intra le gruppo, era absente. Le alteres esseva rivales plus que amicos. Attitudes celante, defensive o hostil esseva melior pro attinger securitate.
Io pensa que le sentir e le conducta human es a pena rational, sed primarimente instinctive, e determinate per factores genetic. Le evolution del specie marcha lente. Nos es essentialmente le mesme humanos que illes que viveva dece milles annos retro.
Alora le consequentia del capitulo anterior es un tendentia natural al discrimination, racismo, conflictos religiose, politic, ethnic e national; prejudicio gruppal e bias de confirmation, dissonantia cognitive; vexation de qui non pertine al gruppo.
Nos vide isto in le tribalismo nove del medias social: que es valide e ver in Twitter non depende del factos, argumentation o veritate; ma del adherentia gruppal. Qui es in le gruppa, ha ration. Qui es foras del gruppo, scribe in galimatias e non merita ser legite. Automaticamente e sin necessitate de explicar. Qui protesta, es blocate.
Isto es un conclusion deprimente. Le idealismo del annos 1960/70 era pro nil. Un illusion total, proque le natura human es plus forte. Pro isto, io crede que nos debe ora cercar le solution a partir de iste natura, non sin illo o contra illo.
Vamos usar le tendentias natural pro attinger resultatos idealistic, como harmonia e pace.
Remane intra le atmosphera pacific e cooperative del proprie gruppo. Qui es foris del gruppo, on lassa tranquille. Illo es multo pacific.
Integration non es necesse! Le revindication de integration de gruppos del population es sovente un effortio tyrannic al assimilation. Le alteres debe devenir exactemente como nos. Ma proque?
Totes pote mantener lor character proprie, lor individualitate, gruppal e individual, intra le regulas del lege. Distantia promove le pace, harmonia e diversitate.
Mi idea pare similar al apartheid. Le differentia es que io promove libertate e derectos equal pro totes.
Il ha nulle objectiones contra contactos con personas extra le proprie gruppo. Il non es obligatori, ma certemente permissibile e consiliabile. Toto sur le base de voluntarietate, utilitate practic o situationes ad hoc.
Si tosto que tal contactos es establite, imagine que le interlocutor es parte de un gruppo commun. Alora instinctivemente le inclination al pace e cooperation va surger, le altruismo per interesses commun.
Iste sentimento de inclusion in un gruppo pote ser temporari o durar plus longe. Illo pote coexister con altere sentimentos de adherentia a gruppos. Pro pacibilemente communicar e interager con alteres, necun del participantes debe renunciar su senso de identitate.
In le commercio, le venditor vole vender, un a precio le plus alte possibile. Le comprator vole emer a un precio ben basse. Le interesse commun es arrivar a un transaction acceptabile pro ambes.
In le empleo: empleatos vole facer non troppo travalio, pro le optime salario. Le empleator vole tener basse le costos del empleo, pro maximisar le lucro. Ma in interprisas lucrative le empleo remane e bon salarios es realisabile. Dunque il es anque in le interesse del empleatos que le interprisa es lucrative. Un interesse commun. Le interprisa es el gruppo commun, in que idealmente totes coopera.
In sports de equipa, le team es le gruppo.
In un quartiero de un citate, omne le habitantes habe le interesses de nettitate, securitate, tranquillitate, distraction, inseniamento, etc. Le diversitate cultural pote coexister con le membrato commun del gruppo de habitantes del quartiero.
Democratia e stato de derecto: iste tamben es un interesse commun, que pote formar un senso de membrato gruppal, ergo un inclination a viver in pace in le pais.
Derecto de autor © 2016, R. Harmsen, tote derectos de copia reservate, all rights reserved.