Cursa de DAFs

Le

Marca

Un question in Facebook: que es isto?

Responsa: isto es un race, un cursa, de DAFs. DAF es un marca nederlandese de autos. Le marca existe ancora hodie, pro camiones, ma in le annos 1960 e 1970 il habeva anque automobiles private. Le nomine proveni de lo del fundator, Hub van Doorne. Assi DAF es Van Doornes Automobielfabriek, le fabrica de automobiles de Van Doorne. Un precursor era Van Doornes Aanhangwagenfabriek, que fabricava aanhangers o aanhangwagens, remolcos.

Alcun modellos DAF on appellava Daffodil, nomine de un narcisso, clarmente derivate jocularmente del marca. Isto es, le nomine del auto, non del flor.

Corregia

Le DAFs non habeva un cassa de velocitates traditional con rotas dentate e velocitates discrete, ma un Variomatic, systema con duo poleas de duo discos trapezoidal, super le quales un corregia transfereva le poter del motor al rota. Il non habeva un prime velocitate, un secunde, et cetera, ma un numero infinite de positiones intermedie: un systema sin scalonamento.

Le systema functionava automaticamente per le uso de pesos in un polea, cuje fortias centrifuge adaptava le position del discos e assi le diametro effective del polea, e resortos in le altere polea.

Cata rota de detra habeva su proprie transmission, assi que un differential non era necesse.

Derision

Le absentia de un levator de cambio face le conducer plus facile que in un auto con velocitates discrete, proque disembracar, cambiar, e reembracar non es requirite. In ille tempores con rolos traditional de homines e feminas, minus feminas guidava autos, e le DAF era relativemente popular inter le feminas. Assi originava in nederlandese un estranie supernomine derogatori pro le DAF: truttenschudder met jarretelaandrijving. In illo trut es un designation negative de feminas, schudden es succuter, le aandrijving es le transmission, e jarretel es le parola pro garrettiera.

Anque hodie le majoritate del autos in Europa e Nederland ha un cassa de cambiamento velocitates a mano, e alcunes automatic, discrete o continue. Secundo mi cognoscimento il non plus ha tendentias differente determinate per le sexo del automobilista. In America le cassas automatic es multo plus volite, quasi standard, probabilemente anque sin distinction de sexo.

Stabilitate

Un auto normal, quando recula, non va plus rapide que 15, forsan 20 km/h. Il ha solo un velocitate, non quatro, cinque o sex como pro de direction avante. Illo es differente in le caso de un DAF. Le Variomatic functiona equalmente ben in ambe directiones. Assi le velocitate maxime del auto es attingibile anque verso detra.

Illo esseva le inspiration pro le achteruitrijraces, cursas de reculamento, del annos 1970. Naturalmente conducer assi es difficile, proque le position al volante non es optime, e anque proque le suspension del rotas anterior es assi que le direction remane stabile automaticamente quando on move in avante, ma non a retro. Assi le cursas non esseva sin accidentes, ma proque le autos habeva un roll bar, un cavia de securitate, vulneres era evitate. Al minus io non me memora haber audite de illos.