Constatation: le 2 e 3 de augusto, texto: le .
Le colores pro indicar le pistas e cassas de pagamento del grande pontes de Svedia e Danmark, es inconsistente.
Pro le grande ponte inter le insulas danese Fyn e Sjælland, de Nyborg a Korsør, le pagamento del pedage eveni al latere est, dunque a Sjælland.
A sinistra il ha le pistas marcate blau, pro qui ha un apparato BroBizz, o qui usa un altere maniera de pagar electronic, e.g. con recognition del matricula del auto, associate in avantia con un carta de credito.
In le direction al dextera seque le pistas e cassas marcate verde, ubi on pote pagar con un carta de credito o carta de debito (carta bancari).
Finalmente il ha un o alcun pistas jalne, que permitte tote le methodos ja mentionate, ma anque le pagamento al contante, in coronas danese o in euros. Ma le cambio es in coronas.
Inter Danmark e Svedia il ha un longe tunnel, e un alte e longe ponte, de København (in svedese: Köpenhamn) e Malmö (in danese: Malmø). Le pagamento eveni al latere est, in Svedia. Ma hic le cassas electronic, al sinistra, es marcate verde, e le pistas e cassas pro un kort, un carta, es blau!
Pagar con moneta contante io crede non es hic possibile.
Pro mi viage recente de Nederland a Svedia e retro, io habeva prepagate un billet de ir e retorno pro le ponte international, ma non pro le ponte intradanese, le qual io ha pagate primo con carta de credito, e con carta de debito al retornar.
Assi io besoniava cata quatro vices un pista e cassa verde, ben que le manieras de pagar esseva differente. Le secunde vice io entrava quasi in un error, que io poteva corriger in le ultime momento. Io arrivava in un pista verde toto al derecto, de facto intendite pro camions. Ma le recognition del placa de matriculation eveniva rapidemente e sin problemas, e le barriera se aperiva pro me.
Pro finalmente reimplaciar le ferry-boat inter Puttgarden (Germania, al insula Fehmarn) e Rødbyhavn (Danmark, al insula Lolland), le preparationes es in cursa pro construer tunnels, pro autos e trainos, sur le fundo del mar. On construe in un grande officina caissons de 200 metros, que on va immerger in le aqua. Le finalisation del connexion es planate pro 2029.
Le placia de pagamento se trovara al latere danese. Io me demanda: que essera hic le colores?
Derectos de autor © 2022 R. Harmsen, tote le derectos reservate, all rights reserved.