Scribite le 18 de julio, corrigite le
Me era indicate curte novas, anque super Nederland. Citation:
“Agricultores del Pais Basse protesta contra le decision del governamento de reducer drasticamente le emissiones de nitrogeno usque 2030. Pro attinger iste scopo, on impone al agricultores exigentias ruinose ducente al bancarupta.”
Io reageva que io concorda con le prime phrase, ma non con le secunde. Como promittite io scribe ora alco plus super le thema.
Le fermeros in Nederland ja comencia protestar ante que mesuras concrete es cognite e elaborate. Le protestos es sovente de natura intimidante, como si illes con le pneus le plus grande a lor tractores debe sempre ganiar. Illes ha visitate assi, in su adresse personal, le ministro de Natura e Nitrogeno, Christianne van der Wal-Zeggelink. Ma con un mediator proponite per le governamento, Johan Remkes (qui ha varie vices monstrate poter solver problemas difficile con multe opiniones e interesses contrari), per anticipation illes refusa parlar.
Fermeros activista ha blocate durante un die le accesso a un interprisa de productos vegetarian, exigente que on muta textos in lor sito web. Ma lo que sta la scripte es ver! In Nederland nos ha libertate de expression, ma illo non es illimitate. Le limites es stipulate in leges, e in casos concrete, solmente un judice pote decider si le limites esseva ultrapassate, e textos debe esser removite. Tamen le interprisa Schouten Europe B.V. se ha lassate intimidar, e ha promittite reconsiderar e revider le textos. Io vide lo como un menacia al stato de derecto.
Le fermeros activista vole necun mesura, necun solution, necun compromisso. Tamen le problemas es real, e existe ja multe decennios. Le problema non es in le agricultura per se, ma plus tosto in le elevamento intensive de bestial. Il ha in Nederland ora 17,6 milliones de humanos, ma anque 100 milliones gallinas, 12 milliones porcos e quasi 4 million vaccas. Fonte: le RIVM. Isto in un pais de 41.500 kilometros quadrate.
Le production es primarimente exportate: le parve Nederland es le secunde exportator de productos agricultural in le mundo, post le Statos Unite. E in le supermercatos nederlandese on vide multe productos importate.
Le excrementos de iste multe animales causa le emission de ammoniaco (NH₃, con aqua: NH₄OH). Il sembla (ma io non es un biologo) que debite a isto, le vegetation in Nederland, includite in zonas ecologic del plano Natura 2000, es reducite a urtica, e quasi tote le altere species botanic es supplantate. Le biodiversitate es in periculo.
Le governamento usava multe annos un solution temporari, in le qual interprisas agricole poteva continuar, mesmo expander, sub le presumption que mesuras technic poterea in le futuro reducer bastantemente le emission de nitrogeno (in le forma de ammoniaco). Ma le methodos technic ha provate esser poco effective, e un tribunal ha judicate que iste politica non basta, e non plus es acceptabile. Ergo ora un reduction del numero de interprisas agricole, e plus importante, un reduction del numero de animales, es inevitabile.
In mi opinion le problemas non es le culpa del paisanos, o non solo lor culpa. Governamentos successive de Nederland ha postponite le problemas e lor solution necessari. Bancas ha solo volite fornir o prorogar prestos si le fermeros era preste de investir in ampliation in scala, e in sempre plus efficientia. Per isto, ora il manca le via retro. Consumitores ha volite comprar carne a precios basse, e le supermercatos ha transmittite iste exigentia al fermeros.
Assi le pais in su totalitate ha un responsabilitate pro solver le problemas, e debe pagar pro le solutiones. E il ha le moneta: le governamento nederlandese ha reservate le amonta vertiginose de 25 milliardos de euros. Isto es € 25.000.000.000.
In Twitter criticos ama usar le parola nederlandese onteigenen, e politicos populista del dextra como illes del FvD (Forum voor Democratie) incoragia lo, con le suggestion que le governamento vole robar le fermas, sin compensation financiari. In realitate, onteigenen, expropriar, refere a un vendita fortiate, pro qui refusa vender. Un vendita fortiate, ma con compensation financiari. Ma anque isto non es al ordine: il ha ora un programma – a implementar per provincias, non le governamento national – de vendita voluntari.
In le programma Nieuwsuur (‘Hora de novas’) del venerdi passate le ministro Van der Wal ha explicate que iste arrangiamento de vendita volontari provincial es a 65% del valor de mercato. Illo me sembla poco. Ma illa ha anque annunciate que in septembre veni un nove regulamento, a 100% del valor commercial.
Naturalmente il non es tactic mitter un baston in le rota de un regulation per promitter un altere que es melior. E le nove schema ancora non ha un base legal, e debe esser approbate per le Union Europee. Retardamento es inevitabile.
Anque io me demanda que es le “marktwaarde” (valor de mercato) in iste contexto. Clarmente un interprisa que marcha ben, e pote esser continuate, ha un altere valor que un ferma que debe esser cessate pro sparniar le natura. On va utilisar le valor original, sin le mesuras? Io lo spera.
Io comprende le emotion del fermeros: il non es facile non vider un futuro, non poter continuar, non poter lassar su filios continuar, non haber claritate e certitude. E moneta non es toto, non compensa toto.
Tamen, io pensa que solutiones es possibile, si on vermente vole. Vamos sperar que le proportion del fermeros qui ora protesta cata die in manieras intimidante, es relativemente basse, e que il ha anque alteres, plus constructive, plus rational.
Le 27 e 28 de julio 2022
Actiones de protesto recente: fermeros ha discargate stercore e residuos sur autostratas. Illes ha versate feno e pneus juxta le partes vehicular, le quales on ha ignite. Alcun del residuos contine asbesto, ergo interprisas specialisate es requirite pro remover le immunditias in un maniera secur.
Le servicio de gestion del autostratas, Rijkswaterstaat, ha problemas in trovar contractores pro le remotion, proque tal interprisas e lor empleatos ha essite intimidate per menacias, si illes va cooperar.
Derecto de autor © 2022, R. Harmsen, tote derectos de copia reservate, all rights reserved.