Musica informal

Relaxation

Usque nunc io ha participate in tres conferentias de interlingua, Åsa in 2014, Benidorm in 2015 e Tisvilde in 2016. Me place sempre le atmosphera agradabile, un de cooperation, respecto e acceptation mutual, toto multo relaxate. Naturalmente on labora seriemente in le cursos e officinas (workshops), ma il ha anque tempore e occasion pro reuniones e activitates informal e minus seriose.

Traditiones musical

Un tradition in conferentias es que al minus in le ultime vespera, on canta cantos del cantario de interlingua, que in su edition actual contine 135 cantos, alcunes original, multes traducite.

Isto es un exemplo del cantar, como costumari con Thomas Breinstrup al piano. Le titulo in interlingua es ‘Le vespere un sabbato’, in 1991 traducite del danese ‘Det var en lørdag aften’ per Ingvar Stenström. Independentemente in circa 1992 Jørgen Kofod-Jensen habeva traducite le mesme cantion, con le titulo ‘Le vespere del sabbato’. On pote comparar: paginas 60 e 61 del Cantario, edition 2016, ISBN 978-2-36607-038-5. Versiones del canto original in danese es ci.

Durante le conferentias sovente se forma spontaneemente gruppos musical, que canta e sona in varie instrumentos, portate per participantes o ja presente in le implaciamento del conferentia. Duo pecias, ‘Computator’ e ‘Le Vento’, con texto e musica original, nascite in le conferentia de 2014, esseva representate e registrate in le vespera final del conferentia de 2016. On pote audir los in Youtube, con fundos visual create per Marcus Scriptor.

Un tertie pecia esseva Qui sin vento va navigar: MP3.

Technica de registration

Iste tres pecias esseva registrate con un bon microphono, de un typo normalmente utilisate pro intervistas. Tamen le qualitate del registration non es perfecte, proque il habeva solmente un microphono pro tote le voces e instrumentos, consequentemente a alcun distantia de illos. E toto in un sol take.

Pro registrationes professional de musica in nostre tempores on usa al minus un microphono pro instrumento o voce, e face le mixtura plus tarde, sovente combinante material de plure takes.

Clarmente pro sonar e cantar insimul on debe repeter in avantia. Isto es le mesme cantion que in alto, ma prendite ab le probas del postmeridie del mesme die. Le qualitate technic del registration es ancora pejor, proque io usava le microphono incastrate in mi laptop, e illo esseva mi prime experimento e experientia con le programma Audacity.

Initialmente le nivello del sono esseva troppo alte, que resultava in clipping, in reaction plus tarde il esseva troppo basse, causante quantisation noise.

Le qualitate musical io lassa al judicamento del lector! 😁 Io sape que in le version de proba, un del prime notas que io sonava al ukulele esseva discorde!

Improvisation

Pro concluder, qui es ancora duo fragmentos del probas: un version instrumental del cantion ‘Computator’; e un improvisation innominate, de novo con Lars Rosenmeier al piano, in que io tentava usar le guitarra classic como guitarra basse.

Intertanto, proque se tracta de un conferentia de interlingua, e proque il es un situation informal e relaxate, on parla. Sempre in interlingua, obviemente. Bon, quasi sempre. 😉


Derecto de autor © 2016, R. Harmsen, tote derectos de copia reservate, all rights reserved.