Le ver veritate

Le 28 de julio 2015

Duo usos

Le parola espaniol ‘verdad’ e su cognato portugese ‘verdade’ on pote usar de duo manieras: como substantivo e como adjectivo (ma an illo es ver?). Nos vide lo in iste exemplos:

es1	¡Eso es la verdad!
es2	¡Eso es verdad!
pt1	Isso é a verdade!
pt2	Isso é verdade!

(Como consuete io usa le norma ISO 639-1 pro indicar le linguas (et hic pro numerar le duo phrases): nederlandese (nl), anglese (en), francese (fr), espaniol (es), portugese (pt), interlingua (ia).)

Iste phrases io interpreta grammaticalmente assi:

In es1 e pt1: le parola verdad(e) es un substantivo.
In es2 e pt2: le parola verdad(e) es un adjectivo, usate como predicato nominal del verbo ‘ser’.

Iste interpretation pote esser provocate per mi proprie lingua, nederlandese. Anque altere linguas, inter le quales linguas fonte de interlingua, habe constructiones que pare sustener mi vision.

Exemplos ex altere linguas

nl1	Dat is de waarheid!
nl2	Dat is waar!
en1	That is the truth!
en2	That is true!
de1	Das ist die Wahrheit!
de2	Das ist wahr!
fr1	Ça c’est la verité !
fr2	Ça c’est vrai !

Nos vide que in tote le linguas mentionate, le adjectivo ha un forma differente del forma del substantivo. Espaniol e portugese es divergente in haber le mesme formas.

Consequentia pro interlingua

Il es pro illo que in interlingua le formas correcte (al minus in mi opinion) es solo ia1 e ia2, e non ia3:

ia1	Illo es le veritate!
ia2	Illo es ver!
ia3	*Illo es veritate!

Ma an il es ver?

Esque mi analyse es justificate?

Dictionarios portugese (Priberam, Porto Editora) marca le parola ‘verdade’ solmente como substantivo (portugese: nome), non como adjectivo.

Ergo, in le phrases es2 e pt2 on pote anque interpretar ‘verdad’ e ‘verdade’ como substantivos, como in es1 e pt1. Le sol differentia alora es que manca le articulo (‘la’ in espaniol e ‘a’ in portugese)!

Ille idea es fortificate per le existentia del adjectivos ‘verdadero’ (es) e ‘verdadeiro’ (pt), que pote esser usate et attributivemente (‘um verdadeiro milagre’, un ver miraculo) et predicativemente (‘o que é verdadeiro’, lo que es ver, lo que es veritabile, veridic, authentic, real).

Nove conclusion alterate

Dunque, ora io pensa que mi sentimento initial, que ia3 esseva incorrecte, es false. Tote le tres phrases ia1, ia2 e ia3 es adequate e possibile in interlingua.

Nonne?