. Correction le 12 de junio 2021.
Quando nos esseva infantes, il existeva un tendentia de demonstrar como sona le lingua francese, per parlar nederlandese durante que nos nos stringeva le naso. Le effecto sonava ben convincente, trovava nos.
Obviemente le ration es le occurrentia de vocales nasalisate in francese, como in le parolas pain (pan) e vin (vino), brun, sans (sin), e salon. Vocales nasalisate, que alcunes appella vocales nasal, termino al qual io longemente me opponeva. Ma de facto ambe terminos es correcte.
Le vocales normal, isto es oral, le typo le plus frequente in le linguas del mundo, es characterisate per un fluxo de aere irrestringite per le bucca. Le altere extremo es le consonantes nasal, o nasales, como [m], [n], [ɳ], [ɲ] e [ŋ]. Durante le pronunciation de un nasal, le aere passa irrestringite per le naso, non le bucca.
Iste distinction, que occurre in tote le linguas, es
controlate per un valvula detra in le bucca. In position
alte, le valvula aperi le bucca e claude le naso, in position
basse illo aperi le naso e claude le bucca. Ma anque un
position intermedie es possibile, que causa que le aere
flue e via le bucca e via le naso. Le resulta es un vocal
nasal.
Correction:
Iste distinction, que occurre in tote le linguas, es
controlate per un valvula detra in le bucca, le velo o palato
molle. In position alte e detra, le valvula claude le naso; in
position basse e avante, illo aperi le naso. In le secunde caso
le bucca pote esser claudite alterubi (velar-, palatal-, dental-,
bilabialmente, etc.), lo que resulta in un nasal; o le bucca
pote esser anque aperte, lo que produce un vocal nasal. Solo
un minoritate del linguas del mundo ha vocales nasal.
Ora como pote le stringer del naso causar un sono que resimila un vocal nasal? Illo es contradictori. Vocales nasal on face per aperir le passage nasal, non per clauder lo. Ergo como pote clauder lo haber un effecto equal o similar?
Le explication, io crede, es in resonantia, e in un reflexo. Si on claude le naso per le digitos, il ha un forte tendentia de aperir le valvula detra in le bucca.
Le sono typic de un vocal nasal es causate per le facto que non duo, ma tres cavitates ha un rolo in colorar le sono: le ventriculo del larynge, le cavitate buccal, e le fossa nasal. Ja per aperir le valvula detra in de bucca, le resonantia nasal es activate.
Confirmationes experimental:
Il es possibile clauder le valvula dum le alettas nasal es ancora serrate per le digitos. Alora le vocal audite muta de un vocal nasal a un vocal normal oral.
Clauder e aperir le naso per le digitos, durante que on pronuncia un vocal nasal, muta alique le timbre del vocal, ma non multo. Le apertura interne al altere latere es multo plus importante e ha un effecto multo major.