Le 17 e , traducite ab le nederlandese per le autor.
Un grande disavantage de mi excogitationes circum electiones parlamentari in duo rondas, clarmente es le exclusion: alcun partitos e candidatos, ben que un numero considerabile de personas ha votate pro illes, non obtenerea su sedes in le Camera. Initialmente, in 2010, iste anque ja me preoccupava. (Articulo in nederlandese, sin plano de traduction.)
Pro isto ora io retorna de ‘Duo rondas, tres partitos’ a ‘Sedes inoccupate’, que ya non ha iste inconveniente. Pro ben comprender iste articulo il es commode saper un poco plus super mi idea de Sedes Inoccupate. Hic es un summario.
In 2017 io identificava duo manieras pro calcular e practicamente organisar le sedes inoccupate. Le 12 de januario circa 0:15 – io ja habeva dormite ma esseva vigile durante alcun tempore – subitemente io videva que il ha anque un tertie maniera, que ha grande avantages.
Nos poterea lassar marchar le electiones como sempre, e impler le sedes del Camera secundo le regulas usual. Necun cambio. Pois le idea de ‘Sedes Inoccupate’ serea realisabile a base de voluntarietate, per membros qui vota, proportionalmente al participation electoral, in le modo hic describite.
Un tolerar sin supportar, ma per partes de omne fraction, qui assi representa le disinteresse (‘il non me importa’) del multes qui non usa lor derecto active electoral. Isto promove le stabilitate de un governamento de coalition con minus partitos, e remove le disavantage de fragmentation politic.
Le avantages es legion:
Nulle adaptation es necesse. Non del Constitution, non del Codice Electoral, non del regulamento de ordine interne del Secunde Camera. Toto remane como es (analyse in nederlandese, nulle traduction planate).
Le systema pote esser introducite immediatemente.
Le sedes inoccupate non plus es vacue, ma il ha la representantes.
Le stabilisation es facite toto voluntarimente, per representantes del populo qui es real e vive. Illes vota sin instructiones o consultation. (No, in 1983 on ha delite le elemento “sin consultation” del Constitution. Io non sapeva illo.)
Iste situation elimina le risco de sabotage: si le cosas menacia escappar del mano, le parlamentarios stabilisante pote prender lor responsabilitate, e tamen non votar pro un motion o lege derailante. Le mesme es ver de propositiones de lege que contraria le Constitution o tractatos international.
Que esserea le resultato in le situation actual in Nederland, pro le Secunde Camera electe al 22 de novembre 2023? Io prende le folio de calculo 2170603a.xls de junio 2017, e adapta lo al datos de ora. Isto es le resultato.
Le effecto es como io expectava: il ha multo plus possibilitates de coalition, multes con tres partitos, mesmo alcunes con duo. Le formation de un coalition governante pote evenir plus rapide- e fluidemente, e le cabinetto que resulta sera plus concorde, ergo plus stabile e vigorose.
Derecto de autor © 2024, R. Harmsen, tote derectos de copia reservate, all rights reserved.