Gratias

Le 22 de april 2018

en: Thank you!
fr: Merci !
it: Grazie!
es: ¡Gracias!
pt: Obrigada! / Obrigado!
de: Danke!
ru: Спасибо! (spasíba)

In interlingua le parola es ‘gratias’, in le qual le littera t es pronunciate [ts], [ˈgratsjas], ma un variante permittite es [ˈgrasjas], que face le expression sonar identic a lo del espaniol in partes del sud de Espania, e in America Central e Meridional.

Illo es conveniente, ma estranie, proque le supporto veni de solo duo linguas de controlo, non de tres como es le requirimento!

Le explication e justification es forsan in le expression pro indicar un cosa o persona que o qui ha possibilisate alique.

en: thanks to
fr: grâce à
it: grazie a
es: gracias a
pt: graças a
de: dank (+ genitivo)
ru: благодаря (blagadária)

Si un prende in consideration le existentia de Familias de parolas, como describite in le section Methodo e technicas del Introduction al IED, le presentia de ‘grâce à’ in francese compensa le absentia de *‘graces’ = gratias in ille lingua.


Plus supporto

Plus tarde ille die, in le postmeridie, io me rendeva conto del existentia de parolas derivate, per exemplo in anglese. Naturalmente grateful (grate) e gratitude (identic in anglese e interlingua) supporta additionalmente le existentia de ‘gratias’ in interlingua, anque si su traduction in anglese es le non-cognate thank you.


Derecto de autor © 2018, R. Harmsen, tote derectos de copia reservate, all rights reserved.