Le 13 e
Le UMI es le Union Mundial pro Interlingua, le organisation international que promove le uso e divulgation del lingua auxiliar ‘interlingua’.
Le direction quotidian del UMI consiste in 2024 de novem personas, qui ha repartite le cargas secundo iste lista.
Il se tracta hic de travalio voluntari: le consilieros non gania un salario.
Le statutos del UMI stipula in articulo 8.5 que cata anno circa 1/3 del consilieros se dimitte. Alora ille postos es aperte pro re-election.
Assi le 31 de decembre 2024 finira le mandato de Madeleine Mahé (presidente), e de Alberto Mardegan (qui es le tresorero, le persona qui administra le financias; e anque le aranea o webmaster, le administrator technic del sito web del UMI).
Como in cata anno par, in 2024 habera loco un Incontro Nordic de interlingua, le 13–17 de augusto in Sigtuna, Svedia, a circa 50 km del capital Stockholm. Durante iste Incontro (texto in svedese e interlingua) evenira, inter altere cosas, le Assemblea General (secundo articulo 6 del Statutos), al qual membros del UMI pote participar in persona o via un connexion de video. Parte del Assemblea es electiones, si es necesse pro nominar nove membros del Consilio de Administration.
Candidatos pro postos in le Consilio de Administration pote presentar se al Commission Electoral, como describite in articulo 7 del statutos del UMI. Membros del Commission Electoral es Alix Potet, Mats Fredmark, e io, Ruud Harmsen (e-posta: infor a rudhar puncto com).
Nove membros eligite in le Consilio de Administration entrara in function le 1 de januario 2025. Al initio de 2025, le Consilio in su nove composition redistribuera le postos, inter illos le tunc vacante positiones de presidente, tresorero, e aranea.