Le 7–8 e 11–.
Traduction al interlingua ipse facte ab le
original portugese del
12–15 de junio 2010.
Alcun dies retro (i.e. le 9 de junio 2010) realisava se electiones pro le parlamento de Nederland. Le debatto tractava super toto le economia: le estimation del stato, le deficit budgetari, impostos, deductibilitate del interesse hypothecari pro le imposto super receptas, dispensas del stato, politica de austeritate.
Quasi nemo discuteva le production de energia e le calefaction global.
Ante le electiones tote le partitos politic habe sempre tempore de emission in le radio e television, conforme a un schema. Alcun partitos tamben compra tempore additional pro annuncios publicitari.
Tosto in le matino, ancora medio dormiente, io audiva un tal message del Partito pro le animales, in que le capite del lista, Marianne Thieme, diceva que illa trovava melior que nos producerea plus energia solar in vice de construer nove centrales electric de carbon.
Io conveni. Nihil es certe in iste vita. Ma multe scientistas opina que le augmento del temperatura debe ser causate per le effecto de estufa, intensificate per emissiones de dioxydo de carbon in le historia recente human. Ce pote haber consequentias grave, como un altiamento del nivello del mar e inundationes de terras basse.
Pro illo io concorda que il es desirabile reducer le emissiones, per producer le major parte del energia que nos besonia per altere medios quam combustibiles fossile.
Ma le cosas non son tan simplice. Substituer le production de electricitate ex carbon o gas natural per energia solar o energia eolic non pote esser le solution. Le varie methodos de production de electricitate non son permutabile, proque illos habe characteristicas multo differente.
Le exigentias que un methodo de production electricitate debe satisfacer, es: disponibilitate permanente garantite. Proque le consumo varia, le production debe ser flexibile e adjustabile. In ultra, le precio debe ser rationabile.
Le mesura in que diverse methodos pote satisfacer los, varia multo:
| Methodo | Adjustabile | Previsibile e garantite | Avantagiose | Presso le consumitor |
|---|---|---|---|---|
| Carbon | − − (1) | + + | + | + + |
| Nuclear | − − (1) | + + | + + | + |
| Gas natural | + + (2) | + + | +/− | + + |
| Geothermia | + | + + | +/− | +/− |
| Energia eolie (vento) | − − | − − (3) | − − | + |
| Solar (sol) | − − | +/− (4) | − − | +/− (5) |
| Hydroenergia (aqua) | + + | + | +/− | − (6) |
In un central electric, o de carbon o nuclear, le calor es transferite al aqua con le fin de producer vapor. Un vice que le aqua e le componentes metallic es calde, le central debe continuar le production. Mitter le machina in marcha o stoppar lo, solo pote ser facte multo lentemente, gradualmente, in un lapso de horas.
Solo si le machina functiona 24 horas per die, 7 dies per septimana, on potera traher profito del rendimento maxime – le qual pro ille typo de centrales es optime!
Ce centrales es appropriate pro fornir le carga normal (carga base, anglese: base load): le quantitate de electricitate que es semper necesse.
Un turbina a gas non besonia aqua como medio de transferentia de calor: le gases de combustion, a alte temperatura e pression, produce energia mechanic e consequentemente electric.
(Existe turbinas a gas que tamben utilisa vapor: in nederlandese: STEG ‘stoom en gas’ = «vapor e gas», in anglese: “CCGT” = combined cycle gas turbine.)
Variar le potentia electric de un turbina a gas es multo plus facile quam in le caso de un central de carbon. Pro ce le turbinas a gas es appropriate pro producer le electricitate del carga medie e carga de puncta.
Quanto al vento nos non sape quando suffla, e si suffla nos non sape si es forte. Le vento pote sufflar quando on besonia multe electricitate, o pote sufflar quando totes dormi. Ergo le energia eolie non es garantitemente disponibile, non es previsibile. Illo non es apte, nec pro le carga de base nec pro le carga de puncta. Illo es bon, in un certe mesura, pro discargar le turbinas a gas.
Quanto al sol nos sape que brilla de die e non brilla de nocte. Ma de die con celo coperte le sol brilla minus intensemente. Ergo le energia solar es garantite e previsibile, solo usque un certe puncto. Illo non es apte por le carga base, mais pote servir, in un certe mesura, pro le carga de puncta.
Il ha multe energia solar in le Sahara, mais la vive pauc personas. Vive un pauco plus in le sud de Hispania e in le sud de Portugal.
Le technologia moderne del energia photovoltaic permitte le utilisation de iste mesme energia in paises presso concentrationes de population, per exemplo in le region del Ruhr in Germania. Mais illac le rendimento es plus basse, que face le methodo minus avantagiose.
Centrales hydroelectric son possibile in paises con bastante pluvia e con montanias, per exemplo in Suissa, Brasil e Norvega. Energia hydroelectric es bastante secur e presagibile – ben que il non sempre pluve, le lacos artificial resolve ille problema.
Norvega pote producer multe energia electric de iste modo, ma habe solo 5 milliones de habitantes. Felicemente existe cablos de alte tension inter Norvega e Nederland, e inter Norvega e Danmark. Plus cablos es projectate inter Norvega e Germania: NorGer e NORD.LINK. Ja existe un cablo inter Svedia e Germania.
De lo que precede se deduce:
Un fornimento de electricitate, solo basate sur sol e vento, non es possibile sin immagazinage de energia. Isto proque ni le sol ni le vento pote fornir le carga de base. Sera necesse centrales de carbon, petroleo o material fissile (scissibile, nuclear).
Pro le carga medie e carga de puncta etiam essera necesse turbinas a gas, si nos non ha installationes de capacitate bastante pro le immagazinage de energia.
Sin immagazinage, a longe termino le fornimento de energia electric non sera averate!
Immagazinage de energia es le unic solution!
Ja existe installationes, ma le capacitate non es sufficiente.
Multe centrales hydroelectric pote ser utilisate in senso inverse: in vice de lassar cader le aqua con le objectivo de producer electricitate, le electricitate pote actionar pumpas que face montar aqua al nivello de un laco artificial.
Clarmente le rendimento del pumpar, e de novemente producer electricitate, non es de 100%! Tamben le distantia, que pote esser multe centenas de kilometros si le central se trova in Norvega, causa perditas de energia.
Existe installationes de immagazination plus presso concentrationes del population: un exemplo es le central hydroelectric reversibile (1096 MW) del Société Électrique de l'Our, in Vianden, Luxemburg. Existe descriptiones in german e francese.
Il ha un altere in Ffestiniog (360 MW) in Galles in Grande Britannia.
In 1981 le ingeniero nederlandese L.W. Lievense developpava un plano pro le utilisation del Markerwaard, un laco con un superficie de 700 km2 in Nederland, como forma de stockage de energia de aerogeradores (turbinas eolic). Le plano nunquam esseva realisate.
Viste que probabilemente multe lectores non sape que es le Markerwaard, e un pagina super iste thema non existe in le Wikipedia in interlingua, forsan un die io va scriber plus super illo.
Mais io promitte nihil.
| Lingua | Titulo |
|---|---|
| Nederlandese | De regelbaarheid van elektriciteitscentrales – Een quickscan in opdracht van het Ministerie van Economische Zaken; 20 april 2009 |
| Anglese, nederlandese | Next Generation Infrastructures (NGInfra Academy) |
| Anglese | Intermittent energy source (Wikipedia) |
| Anglese | Dispatchable generation (Wikipedia) |
| Anglese | Energy storage (Wikipedia) |
| Anglese | Pumped-storage hydroelectricity (Wikipedia) |
| Portugese | Central hidroeléctrica reversível (Wikipedia) |
| Anglese | Solutions to intermittency problem of wind and solar |
| Anglese | Electricity Transmission Grids |
| Nederlandese | Plan Lievense |
| Nederlandese | Nederlandse vereniging voor Energie uit Water (EWA) |
| Nederlandese | Bureau Lievense |
Derecto de autor © 2015, R. Harmsen, tote derectos de copia reservate, all rights reserved.