Filtros estranie?

Le 6 e 7 de martio 2014

Visitas estranie

Qual de mi paginas son multe visitate, esse hic visibile. Lo que illac io vide a vices es inexpectate, mesmo stupefaciente. Paginas le plus tediose que on pote se imaginar, es subito popular. Le plus enoiose partes de un sito web de omne modo ja enoiose, es subitemente frequentate.

Como pote advenir un tal cosa?

Duo del favoritos estranie esseva iste e ille. Intra un thema bastante specialista il ha hic alcun minutiose minutias. Qui es in illo interessate?? Nemo del toto, nonne?

Numero 16 io mesme trova fascinante, ma del resto quasi necun persona. Illo es multe specific e non de interesse general public.

Le plus recente hit superfastidiose es mi articulo Interdentals in English: One or two phonemes?. Un thema mittite sur le interrete in circa 1995 o 1997, que ja tunc io ipse trovava interessante solmente pro rationes historic, pro documentar mi proprie vita – ben que le articulo non clarmente dice quando esseva scribite e quando publicate. In le theoria illac per me describite, super le anglese, ja desde longe tempore io apena credeva.

Como? Perque? Qui?

Dunque ancora un vice le question: proque alicuno serea interessate in un pagina tal enoiose??

Altere question: qui es le visitantes? Le information pro le lista de paginas popular proveni del registro accessos del servitor web Apache. Clarmente, in le file il ha plus information que io monstra sur le schermo, pro rationes de confidentialitate.

Ma como webmaster (administrator del sito) io los pote vider: le sito unde le visitator esseva referite al mie, e le numero IP del visitator.

Le sitos referente es semper sitos con scriptura cyrillic, probabilemente sitos russe o ukrainian. A vices es sitos porno, ma certemente non sempre. Io tamben videva un die un mappa de un grande metrosystema, con nomines cyrillic. Que altere pote esser que le metro de Moscova?

E il ha sitos para discargar. Legal o illegal? Io non sape.

Ex sondages aleatori aperi nunquam ligamines a mi sito in le paginas provenientia. Dunque como pote surferos assi arrivar sur mi paginas?

Le numeros IP del visitantes es quasi sempre in extensiones allocate al fornitores de accesso ukrainian. A vices russe. Le ukrainianes es, inter alteres, del fornitores de telephonia mobile ‘Kyivstar GSM’ e ‘Golden Telecom LLC’.

Luce inopinate

Multe tempore io comprehendeva iste phenomeno non del toto.

Usque le luce del intendimento se accendeva! Il pote tractar se de un filtro! Usantes del servicios de ille fornitores non es permittite acceder certe sitos. In vice de monstrar un schermo vacue o un message de error, iste filtro devia le demanda del usator a un del plus e plus enoiose pagina in le web que on possibilemente poteva trovar: un del mies!!

Io considera illo como un honor. Gratias! Autoironia es un placer eternal.


Le 8 de martio io indicava iste pagina a Kyivstar, como maniera de demandar commentos. Un die depost, le responda esseva:

Доброго дня!

Будь ласка, зверніть увагу, що форма «Зворотній зв'язок» системи «Мій Київстар» призначена виключно для запитань та відгуків стосовно послуг компанії «Київстар».

З найкращими побажаннями,

Центр Обслуговування абонентів «Київстар»

Gratias al Google Translate io comprende lo que precede: ille ukrainianos non comprendeva mi interlingua.


Derecto de autor © 2014, R. Harmsen, tote derectos de copia reservate, all rights reserved.

Colores: Enoiose Extravagante Necun preferentia Recarga le pagina