Le designo de Deo

Historia del scriber del articulo.

Biblia reproba homosexualitate?

Le scriptor e predicante nederlandese Alain Verheij scrutiniava (in un articulo in nederlandese) le biblia pro trovar in illo opiniones super homosexualitate. Ille trovava solo duo locos.

In Levitico 18:22 nos lege (in mi traduction): “Tu non pote facer con un masculo le coito como con un femina, quia illo es un abomination.” In Levitico 20:13 sta simile parolas.

Il stupeface Alain Verheij que certe christianos usa tal textos pro combatter le acceptation del homosexualitate, proque altere regulas ex le prime libros del biblia illes non prende multo seriose, per exemplo: non tocca feminas indisposite (Levitico 18:19, 20:18), non ede alimentos con sanguine (Levitico 19:26), non mitte vestimentos de duo texitos (Levitico 19:19), como de lana e lino (Deuteronomio 22:11).

Le secunde passage super homosexualitate in le biblia es in le Nove Testamento, in le Epistola al Romanos scripte per le apostolo Paulo. In 1:27 sta scripte (de novo in mi proprie traduction):

E similarmente etiam le masculos, habente relicte le uso natural del feminas, ha accendite in desiderio mutual, masculos con masculos turpitude faciente, recipiente in se mesme le recompensa pro lor error.

Il sembla que Paulo hic fortemente censura le homosexualitate e homosexuales, ma – argue Alain Verheij e io pensa que ille ha ration – qui lege le discurso complete de Paulo (Epistola al Romanos 1:18-32 e 2:1-11) comprende que Paulo non censura le homosexuales, ma censura le hypocritas, les qui critica alteres ma pecca alsi mesme. Il es Deo qui judica, non le homine. “Il non ha considerationes del persona apud Deo.” (Rom. 2:11)

(Pro qui sape nederlandese: lege anque le articulo Homoseksualiteit zondig? Welnee!, per Tom van Dijk.)

Altere passages in le biblia, scribe Verheij, que sembla ser contra le homosexualitate, de facto es contra prostitution mascule, o contra le stupro (Genese 19).

Le plano familial de Deo

In un capitulo subsequente de su articulo, Alain Verheij mentiona le exhortation apostolic post-synodal del papa Francisco, intitulate “Amoris Laetitia”, Le Gaudio del Amor. Verheij cita le paragrapho 251. In le version portugese ille paragrapho comencia assi:

No decurso dos debates sobre a dignidade e a missão da família, os Padres sinodais anotaram, quanto aos projetos de equiparação ao matrimónio das uniões entre pessoas homossexuais, que não existe fundamento algum para assimilar ou estabelecer analogias, nem sequer remotas, entre as uniões homossexuais e o desígnio de Deus sobre o matrimónio e a família.

In anglese (PDF):

«In discussing the dignity and mission of the family, the Synod Fathers observed that, “as for proposals to place unions between homosexual persons on the same level as marriage, there are absolutely no grounds for considering homosexual unions to be in any way similar or even remotely analogous to God’s plan for marriage and family”.»

E in mi traduction al interlingua:
Durante que illes discuteva le dignitate e mission del familia, le Patres synodal observava que quanto a propositiones de mitter uniones inter personas homosexual al mesme nivello que le matrimonio, il existe absolutemente necun fundamento pro considerar uniones homosexual de alcun modo similar o mesmo remotemente analoge al plano de Deo pro matrimonio e familia.

Super illo io dice:

Un designo, un plano pro maritage e familia: evidentemente illo existe. In mi vision, sente atheista, illo es un plano del natura, ma viste que credentes crede que Deo ha facite le natura, le essentia de un tal plano de Deo, e un plano del natura, es le mesme.

Sexo inter feminas e masculos es un plano o un systema pro le procreation, ergo pro le superviventia del specie. Ma pro ille superviventia il non es necesse que 100% del humanos, que cata individuo, effectua le plano precisemente in le mesme maniera. Il suffice si 80, 90 o 95% lo face in le maniera traditional.

On estima que inter 5 e 10% pro cento del population es homosexual. E homosexualitate e heterosexualitate non es variationes exclusive, il existe tamben varie grados de bisexualitate. Tote ille variabilitate non del toto menacia le plano sexual que garanti le procreation e le existentia continuate del specie human.

Le reproduction human ha duo aspectos: un es le acto sexual mesme, que a vices conduce a insemination, pregnantia e nascentia. Le acto sexual ha un latere de preferentia exclusive inter partneres, un preferentia instinctive basate sur le chance de bon combinationes genetic. Non pote appellar lo: inamoramento. Ma illo ha etiam un latere promiscue, un de relationes curte e partneres variate, proque variation genetic es in le interesse del sanitate e aptitude del specie.

Le secunde aspecto del reproduction human comencia con le nascentia del neonato: infantes besonia durante un longe periodo le cura, supporto e protection de adulto. Pro illo un copula parental con un relation stabile de longe duration, es favorabile pro le benesser e disveloppamento del infantes.

Le plano natural del reproduction consiste del presentia de tote ille aspectos e lateres in le population. Ma le mixtura exacte, le distribution del aspectos super individuos in varie periodos de lor vita, non face le plano ineffective, ergo non dismenti le designo.

Un copula parental de un homine e un femina, con un o plus infantes, obviemente seque le designo del natura, o le designo de Deo pro qui lo crede. Si le copula es sponsate, o ha registrate o organisate su relation alteremente, non es essential. Lo que conta es lor desiro de ser e remaner insimul e de dar un situation stabile e secur.

Si le copula non ha infantes, voluntari o involuntarimente, il es ille mesme desiro natural, de ser e restar conjuncte, que face le situation compatibile con le plano, con le designo.

Un union simile inter duo feminas o inter duo homines, sin o con infantes, per adoption, matre de substitution o donator de sperma, es conforme le plano, proque le devotion sexual inter le partneres, e le dedication sincer al elevar un infante, es ambes presente.

Mesmo relationes sexual de relativemente curte duration concorda al plano, proque le passion erotic es parte del plano. Ma con filios veni le responsabilitate, un responsabilitate que anque pote prender le forma de anticonception effective.

Il ha in le population human un variation de indoles, includite un variation de inclinationes sexual. Le essentia es que ille variation es inherente al creation e al natura assi como le amor.

Propaganda

Alicunes confunde propaganda pro le acceptation de homosexuales, con propaganda pro homosexualitate. In Russia il mesmo ha legislation basate sur iste confusion.

Heterosexualitate, homosexualitate e bisexualitate non es un decision, sed un indole.

Un masculo qui ha sentite le fortia enorme del attraction que pote venir de feminas, attraction de ab masculos es practicamente o totalmente absente, comprende immediatemente que necun propaganda pote unquam transformar un heterosexual in un homosexual.

Question rhetoric: como es possibile que alcun masculos non lo comprehende?


Nota: traductiones ex le biblia

Nota: citationes ex le biblia in iste articulo io essayava mesme traducer al interlingua, con un oculo al traduction nederlandese del Bijbelgenootschap (1951), le Statenbijbel nederlandese (Levitico 18), le King James Bible (anglese), le Vulgata (Levitico 18, Epistola al Romanos 1) in latino, le Septuaginta (Levitico 18:22, Epistola al Romanos 1:27) in greco (la monstrate con parolas numerate in greco et anglese), e le traduction de Buckhalter in interlingua.


Historia del scriber del articulo.

Le idea surgeva le 3 de april. Le texto esseva scribite 6, 9, 12 e 15 de junio 2017.


Colores: Enoiose Extravagante Necun preferentia Recarga le pagina