Dictatura es melior?

Le 9 de julio 2017

An es un dictatura melior pro un pais que un systema democratic?

In un democratia le decisiones non pote ser prendite rapidemente, proque multe discussion es necesse pro convincer bastante membros del collegio democratic que prende o consenti le mensuras e leges. Tote le decisiones debe esser compromissos, que respecta multe interesses incompatibile. Illo face le decisiones e leges complicate e sovente ineffective.

Un governamento non-democratic pote firme- e resolutemente conducer su politica. Si ille politica es bon pro le populo e nation, e non solo servi le interesses del politicos mesme, le resultatos pote ser positive. Ma le reverso del medalia es que manca le libertate de opinion e de pressa. Il ha repression, accesso al internet con blocadas, un pavor de developpar e propagar nove ideas, carceratos politic, forsan tortura.

Esque in China le situation economic esserea melior o pejor, si China habeva habite post Mao Zedong un governamento democratic, in vice del autocratic que hodie ancora habe? Forsan pejor.

On dice que multes in China non exprime su opiniones politic, non solo pro ration del oppression, ma anque proque illes es satisfacte con le situation actual. Illes compara su circumstantias economic con illos de su parentes e granparentes, e vide que le sues es multo melior. Ergo proque voler un governamento differente?

Tamen io remane un democrate e vehementemente opponite a oppression, autocratia e dictatura. Como reconciliar lo con le avantages que io vide in un dictatura como le chinese?

In le systema democratic que io propone, illes que non vota in le electiones, es tractate como le chineses que es non-politic proque le nivello del vita a illes es plus importante. Illes ha decidite lassar le governamento governar, sin immiscer se in illo. Ma tunc non per timor como in paises con oppression, ma per libere arbitrio.

In un tal systema remane le protection del interesses minoritari, le libere expression de opiniones e ideas, le libertate de pressa, e le possibilitate de reimplaciar periodicamente politicos que ha perdite su credibilitate e le credentia del publico.

Assi illo uni tote le avantages. Un systema ideal pro omne paises in tote le mundo.


Colores: Enoiose Extravagante Necun preferentia Recarga le pagina